සරත් ෆොන්සේකා ඝාතන තැත : වසර 17කට පසු සැකකරුවන්ට ඇප - තවදුරටත් බන්ධනාගාරයට!

හිටපු යුද හමුදාපති, ජෙනරාල් සරත් ෆොන්සේකා මහතා ඝාතනය කිරීමට තැත්කිරීමේ සිදුවීමට අනුබල දීමේ චෝදනා ලැබූ හිටපු එල්.ටී.ටී.ඊ. සාමාජිකයන් දෙදෙනකුට වසර 17ක දීර්ඝ රක්ෂිත බන්ධනාගාර කාලයකින් පසු කොළඹ මහාධිකරණය මගින් ඊයේ (31) ඇප නියම කරන ලදී. කොළඹ මහාධිකරණ විනිසුරු බුද්ධි සී. රාගල මෙම නියෝගය ලබා දුන්නේය. කෙසේවෙතත්, අධිකරණය විසින් පනවන ලද ඇප කොන්දේසි සපුරාලීමට අපොහොසත් වීම හේතුවෙන් විත්තිකරුවන් දෙදෙනා නැවතත් රක්ෂිත බන්ධනාගාරගත කිරීමට සිදුව තිබේ. අධිකරණය මගින් සැකකරුවන්ට රුපියල් ලක්ෂ 2ක මුදල් ඇපයක් සහ රුපියල් ලක්ෂ 50 බැගින් වූ ශරීර ඇප හතරක් නියම කළ අතර, ඔවුන්ගේ විදේශ ගමන් බලපත්‍ර අධිකරණය භාරයට ගැනීමටද, මාසයකට දෙවතාවක් ත්‍රස්ත මර්දන කොට්ඨාසය හමුවේ පෙනීසිටීමටද කොන්දේසි පනවා තිබේ. මෙලෙස ඇප නියම වූයේ ශම්මුගලිංගම් සූරියකුමාර් සහ තම්බයියා ප්‍රකාශ් (නොහොත් ‘ධනුෂ්’) යන විත්තිකරුවන්ටය. අභියාචනාධිකරණයට ඉදිරිපත් කළ මෝසමක් සලකා බැලීමෙන් අනතුරුව, ඔවුන් වසර 17ක දීර්ඝ කාලයක් බන්ධනාගාරගතව සිටීම පදනම් කරගනිමින් මෙම ඇප හිමිවිය. 2006 අප්‍රේල් 25 වන දින කොළඹ යුද හමුදා මූලස්ථාන පිවිසුම අසලදී ‘දුර්ගා’ නමැති එල්.ටී.ටී.ඊ. මරාගෙන මැරෙන බෝම්බකාරිය විසින් එල්ල කරන ලද මෙම ප්‍රහාරයෙන් එවකට හමුදාපතිවරයා බරපතළ ලෙස තුවාල ලැබූ අතර, ඔහුගේ ආරක්ෂක නිලධාරීන් ඇතුළු කිහිපදෙනකු ජීවිතක්ෂයට පත්විය. නීතිපතිවරයා විසින් විත්තිකරුවන්ට එරෙහිව අධිචෝදනා 230ක් යටතේ නඩු පවරා ඇත. මීට අමතරව, මෙම විත්තිකරුවන්ට එරෙහිව හිටපු ඇමැති ජෙයරාජ් ප්‍රනාන්දුපුල්ලේ ඝාතනයට අනුබල දීම (එයින් ඔවුන් නිදහස් වී ඇත) සහ හිටපු ජනාධිපති මෛත්‍රීපාල සිරිසේන ඝාතනය කිරීමට තැත් කිරීම සම්බන්ධයෙන්ද නඩු පවරා තිබේ. මෛත්‍රීපාල සිරිසේනට අදාළ නඩුවේ ඇප නියෝගය ලබන අගෝස්තු 7 වැනිදා ප්‍රකාශයට පත්කිරීමට නියමිතය.