ලංකාව අර්බුදයෙන් ගොඩගත්තේ රනිල්.. ඔහු නොහිටියා නම් යන්නවත් බැරිවෙනවා..- ඇමරිකාවේ හිටපු තානාපති මාධ්‍ය හමුවේ

හිරු නාලිකාව සමඟ සාකච්ඡාවකට එක්වෙමින් ඒ මහතා මේ බව සඳහන් කළේය. ජාත්‍යන්තර මූල්‍ය අරමුදල සමඟ පැවැති සාකච්ඡා සාර්ථක කර ගැනීමට රනිල් වික්‍රමසිංහ මහතාගේ මැදිහත්වීම තීරණාත්මක වූ බවත්, ඔහු නොසිටින්නට එම වැඩපිළිවෙළ නිසි පරිදි ක්‍රියාත්මක කිරීමට නොහැකි වනු ඇති බවත් හිටපු තානාපතිවරයා මෙහිදී අවධාරණය කළේය. තමා පාර්ලිමේන්තු මන්ත්‍රී ධුරයෙන් ඉල්ලා අස්වී තානාපති ධුරය භාර ගැනීමට ගත් තීරණය නිවැරදි බව අද වන විට තහවුරු වී ඇති බව ද ඔහු පැවසීය. එම අවස්ථාවේදී තමා පසුපෙළ මන්ත්‍රීවරයෙකු ලෙස සිටීමෙන් රටට සේවයක් කිරීමට අවස්ථාවක් නොලැබුණු බවත්, තානාපතිවරයා ලෙස ජාත්‍යන්තර මූල්‍ය අරමුදල සමඟ මුල්ම යෝජනාව ඉදිරිපත් කිරීමට තමාට හැකි වූ බවත් ඔහු සිහිපත් කළේය. එමෙන්ම, ඇමරිකා එක්සත් ජනපදය විසින් මෙරට ශ්‍රමිකයන් සම්බන්ධයෙන් සිදුකරන විමර්ශන සහ තීරුබදු සහන පිළිබඳව ද අදහස් දැක්වූ මහින්ද සමරසිංහ මහතා, ඉදිරියේදී ප්‍රතිපත්තිමය වෙනස්කම් සිදුවුවහොත් එමගින් ආර්ථිකයට යම් අවදානමක් ඇතිවිය හැකි බව ද පෙන්වා දුන්නේය. රජය විසින් ගනු ලබන තීරණ මත ජාත්‍යන්තර සහයෝගීතාවය රඳා පවතින බව ද ඔහු වැඩිදුරටත් සඳහන් කළේය.