යුක්‍රේනයට අලුත් ජනාදිපති කෙනෙක් පත් කරගන්නැයි කියා ට්‍රම්ප් පුටින් කරට අත දාගනිති.. ඓතිහාසික ගිවිසුමක්..

ඇමෙරිකාව සහ ජාත්‍යන්තර වෙළෙඳපොළ තුළ උද්ගතව ඇති ඉන්ධන හිඟය සමනය කිරීමේ අරමුණින් රුසියාව සහ එක්සත් ජනපදය අතර ඓතිහාසික බලශක්ති ගිවිසුමකට එළඹ ඇති අතර, රුසියාව සමඟ සාම එකඟතාවලට නොපැමිණෙමින් ගෝලීය ඩීසල් අර්‍බුදය තවදුරටත් උග්‍ර කරන බවට චෝදනා කරමින් යුක්‍රේන ජනාධිපති ව්ලැදිමීර් සෙලෙන්ස්කි වහා ධුරයෙන් ඉවත් කළ යුතු බව අමෙරිකානු ජනාධිපති ඩොනල්ඩ් ට්‍රම්ප් ප්‍රකාශ කර ඇතැයි RT පුවත් සේවය වාර්‍තා කරයි. ධවල මන්දිරය ඉදිරිපිටදී මාධ්‍ය අමතමින් ජනාධිපති ට්‍රම්ප් සඳහන් කර ඇත්තේ, යුක්‍රේනය විසින් නව ජනාධිපතිවරයෙකු තෝරා පත් කරගත යුතු කාලය එළඹ ඇති බවයි. යුද්ධය නිමා කර සාමය ඇති කිරීමට ඇති අවස්ථා ප්‍රතික්ෂේප කරමින් සෙලෙන්ස්කි ගෝලීය ඉන්ධන අර්‍බුදයට වගකිවයුතු අයුරින් ක්‍රියා කරන බවට ට්‍රම්ප් එහිදී සෘජුව චෝදනා කර තිබේ. මෙම ප්‍රකාශයට පෙර, ජනාධිපති ඩොනල්ඩ් ට්‍රම්ප් සහ රුසියානු ජනාධිපති ව්ලැදිමීර් පුටින් අතර විනාඩි 90 ක කාලයක් පුරා පැවති තීරණාත්මක දුරකථන සංවාදයකින් අනතුරුව දෙරට අතර මෙම ඩීසල් ගනුදෙනුව තහවුරු කරගෙන ඇත. ඒ අනුව, රුසියාව විසින් වහාම ඩීසල් ටොන් 300,000 කට අධික ප්‍රමාණයක් ඇමෙරිකාවට සහ ගෝලීය වෙළෙඳපොළට සැපයීමට නියමිත අතර, නොවැම්බර් මාසයේදී තවත් ටොන් 500,000 ක් සහ ඉන් අනතුරුව අතිරේක ටොන් මිලියනයක් ලබාදීමට එකඟතාව පළවී තිබේ. මෙම ගනුදෙනුව ක්‍රියාත්මක කිරීම පහසු කරනු වස්, රුසියානු ඩීසල් නැව්ගත කිරීම් සඳහා පනවා තිබූ සම්බාධක 2027 අප්‍රේල් 7 වැනිදා දක්වා තාවකාලිකව ඉවත් කිරීමට අමෙරිකානු භාණ්ඩාගාර දෙපාර්‍තමේන්තුව විශේෂ බලපත්‍රයක් නිකුත් කර ඇති බවද වාර්‍තාවේ දැක්වේ. ගිවිසුම ප්‍රකාශයට පත්වීමත් සමඟ අමෙරිකානු වෙළෙඳපොළේ ඩීසල් අනාගත මිල ගණන් ක්ෂණිකව 5% කින් පමණ පහත වැටී ඇති අතර ගැලුමක මිල ඩොලර් 4.64 ක් දක්වා පහත බැස ඇත. ඉදිරි මාසය තුළ පැවැත්වීමට නියමිත ඇමෙරිකානු මධ්‍යවාර මැතිවරණය හමුවේ ඉන්ධන මිල ඉහළ යාම රිපබ්ලිකන් පක්ෂයට දැඩි දේශපාලන අභියෝගයක්ව පැවති බැවින්, මෙම තීරණය ට්‍රම්ප් සහ පුටින් යන නායකයන් දෙපළටම හිමිවූ ක්ෂණික දේශපාලන හා ආර්‍ථික ජයග්‍රහණයක් බව විශේෂඥයන් පෙන්වා දෙයි. නායකයන් දෙදෙනාගේ සාකච්ඡාවේදී යුක්‍රේන යුද ගැටුම් පිළිබඳව ද දීර්‍ඝ ලෙස සාකච්ඡා වී ඇති අතර, රුසියාවේ බලශක්ති යටිතල පහසුකම් ඉලක්ක කර යුක්‍රේනය එල්ල කරන ප්‍රහාර හමුවේ පවතින තත්ත්වය පුටින් විසින් ට්‍රම්ප් හමුවේ විස්තර කර තිබේ. රුසියාව, යුක්‍රේනය සහ ඇමෙරිකාව අතර පැවැත්වීමට සැලසුම් කර තිබූ ත්‍රෛපාර්‍ශ්වික සාකච්ඡා යුක්‍රේනයේ ආක්‍රමණශීලී ක්‍රියාකලාපය හමුවේ ඇණහිට ඇති බවත්, සාකච්ඡා යළි ආරම්භ කිරීම සම්බන්ධයෙන් මොස්කව් පාලනය මේ වන විට යළි සලකා බලමින් සිටින බවත් ක්‍රෙම්ලින් විදේශ ප්‍රතිපත්ති සහායක යූරි උෂාකොව් වැඩිදුරටත් සඳහන් කර ඇත.