පාසල් සිසුන් මඩ පාරේ යති..

නානුඔය - රැදැල්ල කෙටි මාර්‍ගයේ පිහිටි 'කාර්‍ලිබැක්' (Carliback) හන්දියේ ප්‍රධාන මාර්‍ගය යට කරගෙන තිබූ ගංවතුර බැස ගියද, ඉතිරි වී ඇති පස් තට්ටුව ඝන මඩ බවට පත්ව තිබේ. මේ හේතුවෙන් එම මාර්‍ගය ඔස්සේ ගමන් කරන අයට දැඩි අපහසුතාවක් මෙන්ම අප්‍රසන්න තත්වයක් ද උද්ගත වී ඇත. නුවරඑළියේ පවතින අස්ථාවර කාලගුණ තත්ත්වය හේතුවෙන්, සවස් කාලයේ ඇද හැලෙන අධික වර්‍ෂාව නිසා කාර්‍ලිබැක් හන්දියේ ප්‍රධාන මාර්‍ගය නිතරම මඩ සහ දිය සහිත රොන් මඩවලින් පිරී යයි. මෙය සිසුන්ගේ පාවහන් සහ නිල ඇඳුම්වලට හානි සිදු කරනවා පමණක් නොව, විවිධ ආසාදන ඇතිවීමේ අවදානමක් ද මතු කරයි. පාසල් යන කුඩා දරුවන්ගේ සිට වැඩිහිටි සිසුන් දක්වා සියලු දෙනාටම, තම පාවහන්, ඇඳුම් සහ පාසල් බෑග් මඩ හා ජලයෙන් ආරක්ෂා කර ගැනීමට දැඩි පරිශ්‍රමයක් දරමින්, මෙවැනි අවදානම් සහගත තත්වයන් යටතේ මෙම මාර්‍ගය ඔස්සේ ගමන් කිරීමට සිදුව තිබෙන බවත්, සිසුන්ගේ යහපත වෙනුවෙන් මෙම මාර්‍ගය කඩිනමින් අලුත්වැඩියා කර දෙන ලෙස ප්‍රදේශවාසීන් ඉල්ලා සිටිති. තවද, මෙම ප්‍රදේශයේ ගංවතුර එකතු වීම හෝ ජලය ගලා යාම වැළැක්වීම සඳහා අවශ්‍ය පියවර ගන්නා ලෙස ද ප්‍රදේශවාසීන් ඉල්ලා සිටිති.