සුභාවිත ගීත කලාවේ ශ්‍රී ලංකා රන් සලකුණ අවසන් ගමන් යයි...

මියයන විට ඇය 82 වැනි වියේ පසුවූ අතර, නාවල ප්‍රදේශයේ පිහිටි සිය නිවසේදී ඇය අභාවප්‍රාප්ත වූ බව පවුලේ ආරංචි මාර්‍ග තහවුරු කරයි. 1943 අගෝස්තු මස 23 වැනිදා අලුත්ගම, ලෙවන්දූව ග්‍රාමයේදී උපත ලැබූ නන්දා මාලනිය මහත්මිය, පවුලේ දරුවන් නව දෙනෙකුගෙන් යුත් පවුලක සිව්වැනි දරුවා ලෙස මෙලොව එළිය දුටුවාය. කුඩා කල සිටම සහජ ගායන හැකියාවන් ප්‍රදර්‍ශනය කළ ඇය, කොළඹ ශ්‍රී ගෝතමී මහා විද්‍යාලයෙන් අධ්‍යාපනය ලැබූ අතර එහිදී ඇයගේ සංගීත ගුරුවරයා වූ ටී.එන්. මාග්‍රට් මහත්මිය ඇයගේ දක්ෂතා හඳුනාගෙන ඉදිරියට ගෙන යාමට මග පෙන්වූවාය. ඇයගේ කලා ජීවිතයේ හැරවුම් ලක්ෂ්‍යය සනිටුහන් වූයේ කරුණාරත්න අබේසේකරයන්ගේ 'ළමා පිටිය' වැඩසටහන හරහාය. එහිදී ඇය ගැයූ 'බුදු සාදු' ගීතය අතිශය ජනප්‍රියත්වයට පත් විය. පසුව 1961 වසරේදී තිරගත වූ 'රන්මුතු දූව' චිත්‍රපටය සඳහා 'ගලන ගඟකි ජීවිතේ' ගීතය ගායනා කරමින් ඇය සිනමා පසුබිම් ගායනයට පිවිසියාය. ඉන්දියාවේ ලක්නව්හි භාත්ඛණ්ඩේ සංගීත විද්‍යායතනයෙන් සංගීත විශාරද උපාධිය ලැබූ ඇය, දශක හයකට අධික කාලයක් මෙරට සංගීත ක්ෂේත්‍රය පෝෂණය කළාය. 'සත්‍යයේ ගීතය', 'පවන' වැනි ප්‍රසංග මාලාවන් හරහා සමාජ සාධාරණත්වය සහ මානව හිතවාදී තේමාවන් ගීතයට මුසු කළ ඇය, මෙරට ජනතාවගේ හදගැස්ම හඳුනාගත් කලාකාරිනියක ලෙස ගෞරවයට පාත්‍ර වූවාය. සිය කලා ජීවිතය තුළ හොඳම පසුබිම් ගායිකාව සඳහා වන සරසවිය සම්මාන 11ක්, ජනාධිපති සම්මාන 08ක් ඇතුළු දේශීය හා විදේශීය සම්මාන රැසකින් ඇය පිදුම් ලැබුවාය. ඇයගේ අභාවය මෙරට කලා ක්ෂේත්‍රයට මෙන්ම සමස්ත ජාතියටම පිරිමැසිය නොහැකි දැවැන්ත පාඩුවකි. දේහය පිළිබඳ අවසන් කටයුතු සම්බන්ධ තොරතුරු ඉදිරියේදී දැනුම් දීමට නියමිතය.