ආණ්ඩුවෙන් තර්‍ජනය කරනවා... එනිසා සාකච්චා කල් දානවා - නීතිඥ සංගමය

යෝජිත විනිසුරුවන්ගේ විශ්‍රාම ගැන්වීමේ වයස දීර්‍ඝ කිරීමේ ආණ්ඩුක්‍රම ව්‍යවස්ථා සංශෝධනය සම්බන්ධයෙන් පාර්‍ලිමේන්තු මන්ත්‍රීවරුන් දැනුවත් කිරීම සඳහා සංවිධානය කර තිබූ හමුව කල් දමන ලෙස ශ්‍රී ලංකා නීතිඥ සංගමය විපක්ෂ නායක සජිත් ප්‍රේමදාස මහතාගෙන් ඉල්ලා සිටී. නීතිඥ සංගමයේ සභාපති රජීව් අමරසූරිය මහතා විසින් විපක්ෂ නායකවරයා වෙත යොමු කරන ලද විශේෂ ලිපියක දැක්වෙන්නේ, පාර්‍ලිමේන්තුව තුළ රජය ක්‍රියා කළ ආකාරය සහ ඔවුන් පළ කළ තර්‍ජනාත්මක ස්වරූපය (Expressed threat) හේතුවෙන් මෙම දැනුවත් කිරීමේ හමුව පැවැත්වීමට සුදුසු පරිසරයක් නොමැති බවයි. මෙම ව්‍යවස්ථා සංශෝධනය පිළිබඳව ආණ්ඩු පක්ෂයේ සහ විපක්ෂයේ මන්ත්‍රීවරුන් දැනුවත් කිරීම ජාතික වශයෙන් වැදගත් කරුණක් වුවද, රජයේ පාර්‍ශවයෙන් එල්ල වන බලපෑම් හමුවේ ඒ සඳහා පොදු එකඟතාවක් හෝ ද්විපාර්‍ශ්වික සහභාගීත්වයක් අපේක්ෂා කළ නොහැකි බව නීතිඥ සංගමය පෙන්වා දෙයි. විශේෂයෙන්ම රජය සිය මන්ත්‍රීවරුන්ට මෙම අවස්ථාව ලබා දීමට උනන්දුවක් නොදක්වන බවත්, පවතින තර්‍ජනාත්මක වාතාවරණය හමුවේ රජයේ මන්ත්‍රීවරුන්ගේ සහභාගීත්වය සහතික කළ නොහැකි බවත් එම ලිපියේ සඳහන් වේ. විපක්ෂය දැනටමත් මෙම සංශෝධනයට සිය දැඩි විරෝධය පළ කර ඇති අතර, නීතිඥ සංගමය අවධාරණය කරන්නේ මෙම දැනුවත් කිරීමේ හමුව වඩාත් වැදගත් වන්නේ රජයේ මන්ත්‍රීවරුන්ට මෙම කරුණ පිළිබඳව වෛෂයිකව කරුණු වටහා ගැනීමට බවයි. එබැවින්, ආණ්ඩුවේ බලපෑම් සහ බාධා කිරීම් මධ්‍යයේ මෙම හමුව පැවැත්වීම පලක් නොවන බැවින්, ආණ්ඩු පක්ෂයේ සහ විපක්ෂයේ යන දෙපාර්‍ශවයේම සහභාගීත්වය සහතික වන තෙක් එය කල් දමන ලෙස නීතිඥ සංගමය විපක්ෂ නායකවරයාගෙන් වැඩිදුරටත් ඉල්ලා ඇත. මෙවැනි දැනුවත් කිරීමේ හමුවක් යෝජනා කිරීම සම්බන්ධයෙන් විපක්ෂ නායකවරයාට ස්තූතිය පළ කරන නීතිඥ සංගමය, එය ව්‍යවස්ථාදායක විවාදයකදී ඉතා ප්‍රගතිශීලී පියවරක් වුවද ආණ්ඩුවේ වර්‍තමාන හැසිරීම හමුවේ එය කල් දැමීම උචිත බව දන්වා තිබේ.