හිටපු ලොක්කෙකුගේ පුතෙක් ලොකු අමාරුවක.. විදෙස් ආයෝජකයෙකුගෙන් ඩොලර් මිලියන හතක් උස්සලා කියා පැමිණිල්ලක්...

'සිවිල් බුද්ධි පෙරමුණ' සංවිධානයේ සභාපති සංජය මහවත්ත මහතා ජනාධිපති ලේකම් කාර්‍යාලය වෙත මෙම පැමිණිල්ල ඉදිරිපත් කිරීමෙන් අනතුරුව මාධ්‍ය වෙත අදහස් දක්වමින් මේ බව අනාවරණය කළේය. ඔහු සඳහන් කළේ, 2022 වසරේදී සිංගප්පූරු ජාතික Lee සහ Andrew යන ආයෝජකයන් දෙදෙනා Limit One නමැති සමාගම හරහා ශ්‍රී ලංකා ආයෝජන මණ්ඩලයේ අනුමැතිය සහිත ව්‍යාපෘතියක් ලෙස මෙම මුදල මෙරටට රැගෙන ආ බවයි. එම ආයෝජනය මෙරටදී භාරගැනීම සඳහා Lankaila නමින් සමාගමක් පිහිටුවා ඇති අතර, එවකට පැවති දේශපාලන බලය සහ සබඳතා උපයෝගී කරගනිමින් හිටපු අමාත්‍යවරයාගේ පුත් දක්ෂිත බෝගොල්ලාගම එහි හිමිකාරිත්වය ලබාගෙන ඇති බවද හෙතෙම පැවසීය. විදේශ ආයෝජකයන් දෙදෙනා නොමඟ යවමින්, දක්ෂිත බෝගොල්ලාගම නමැත්තා අදාළ ඩොලර් මිලියන හතක මුදල තමන්ගේ පෞද්ගලික ධනයක් ලෙස භාවිත කරමින් හෝටල් 6ක ආයෝජනය කර ඇති බව මහවත්ත මහතා චෝදනා කරයි. සිලෝන් හොටෙල්ස්, සෙරීන් ස්ටාර්, ඔගාරි එජ් සහ සන්‍රයිස් කබානාස් ඇතුළු හෝටල් කිහිපයකට එම මුදල් යොදවා පසුව නීතිවිරෝධී ලෙස එම හෝටල් සමූහයේ කොටස් වෙනත් තුන්වන පාර්‍ශ්වයන් වෙත පවරා ඇති බවද ඔහු හෙළි කළේය. පසුගිය පාලන සමයන්හි දේශපාලනඥයන්ගේ දරුවන් සිදුකළ මෙවැනි මූල්‍ය වංචා හේතුවෙන් සෘජු විදේශ ආයෝජකයන් මෙරටට පැමිණීමට බියක් දක්වන බව පෙන්වා දුන් සංජය මහවත්ත මහතා, මොහු විසින් අක්කර අටක පමණ රජයේ ඉඩමක් ද ගොඩකර අත්පත් කරගැනීමේ සිද්ධියක් සම්බන්ධයෙන් ඉදිරියේදී කරුණු හෙළි කරන බවද පැවසීය. විදේශ ආයෝජනවලට මෙන්ම රටේ ආර්‍ථිකයට ද දැඩි ලෙස හානි පමුණුවන මෙවැනි වංචා පිළිබඳව වහාම අපරාධ පරීක්ෂණයක් ආරම්භ කර නීතිය ක්‍රියාත්මක කරන ලෙස ජනාධිපතිවරයාගෙන් සහ වත්මන් රජයෙන් ඉල්ලා සිටි බවද ඔහු වැඩිදුරටත් සඳහන් කළේය.