තෙල්, ගෑස් විශාල මිල වැඩිකිරීමක් සමාගම් ඉල්ලනවා.. හිගය ඒකයි..- බලශක්ති ඇමති

කෙසේ වෙතත්, පවතින තත්ත්වය හමුවේ ඉන්ධන හෝ ගෑස් මිල ඉහළ දැමීමට රජයේ කිසිදු අදහසක් නොමැති බවද අමාත්‍යවරයා අවධාරණය කළේය. මේ පිළිබඳව වැඩිදුරටත් කරුණු පැහැදිලි කළ අමාත්‍යවරයා සඳහන් කළේ, ලංකා ඛනිජ තෙල් නීතිගත සංස්ථාව සතු පිරවුම්හල් සතුව ප්‍රමාණවත් තරම් ඉන්ධන තොග පවතින බැවින් එම පිරවුම්හල්වලින් කිසිදු හිඟයකින් තොරව ජනතාවට ඉන්ධන ලබාගත හැකි බවයි. වත්මන් ඉන්ධන හිඟය පවතින්නේ පෞද්ගලික පිරවුම්හල් ආශ්‍රිතව පමණක් බවද ඔහු පෙන්වා දුන්නේය. මැදපෙරදිග කලාපයේ උද්ගතව ඇති යුදමය නොසන්සුන්තාවත් සමඟ ලෝක වෙළෙඳපොළේ ඉන්ධන මිල සැලකිය යුතු ලෙස ඉහළ ගොස් තිබේ. එම තත්ත්වය පදනම් කරගනිමින් මෙරට ඉන්ධන මිලද විශාල වශයෙන් ඉහළ දමන ලෙස පෞද්ගලික සැපයුම් සමාගම් රජයෙන් ඉල්ලා සිටින බව අමාත්‍යවරයා අනාවරණය කළේය. එසේ වුවද, පාරිභෝගික ජනතාව පිට බර පැටවීමට රජය සූදානම් නොමැති අතර, අදාළ පෞද්ගලික සමාගම් විසින් ඒකාධිකාරයක් ගොඩනගාගෙන ඇති ප්‍රදේශවල ජනතාවට සහන සැලසීම සඳහා ඛනිජ තෙල් නීතිගත සංස්ථාව යටතේ නව පිරවුම්හල් කඩිනමින් ස්ථාපිත කිරීමට සැලසුම් කර ඇති බව හෙතෙම සඳහන් කළේය. ගෑස් වෙළෙඳපොළේ පවතින තත්ත්වය පිළිබඳව අදහස් දැක්වූ අමාත්‍යවරයා, රාජ්‍ය සතු 'ලිට්‍රෝ' සමාගම සතුව ප්‍රමාණවත් ගෑස් තොග පවතින බැවින් එහි කිසිදු හිඟයක් නොමැති බව ප්‍රකාශ කළේය. පෞද්ගලික සමාගම් බෙදාහරින ගෑස්වල පමණක් මෙලෙස හිඟයක් මතු වී ඇත්තේ ලෝක වෙළෙඳපොළ මිල ගණන්වලට සාපේක්ෂව මෙරට ගෑස් මිල ඉහළ දැමිය යුතු බවට එම සමාගම් කරන බලපෑම මතය. පවතින මිලට ගෑස් අලෙවි කිරීමෙන් තමන්ට ලාභයක් නොලබන බව පවසමින් ඔවුන් මෙලෙස සැපයුම් සීමා කර ඇති බව අමාත්‍ය අනුර කරුණාතිලක මහතා වැඩිදුරටත් සඳහන් කළේය. මෑත කාලීනව මෙරට බලශක්ති ක්ෂේත්‍රයේ තරගකාරීත්වය වර්‍ධනය කිරීම සහ ඩොලර් අර්‍බුදයට විසඳුමක් ලෙස විදේශීය හා පෞද්ගලික සමාගම් කිහිපයකටම මෙරට ඉන්ධන සහ ගෑස් සිල්ලර වෙළෙඳපොළට පිවිසීමට අවස්ථාව ලබා දෙන ලදී. කෙසේ වෙතත්, මැදපෙරදිග යුද ගැටුම් උත්සන්න වීම හේතුවෙන් ගෝලීය වශයෙන් බොරතෙල් සහ ද්‍රව පෙට්‍රෝලියම් වායු (LPG) මිල ශීඝ්‍රයෙන් ඉහළ යමින් පවති.