ලංකා ආණ්ඩුවෙන් අනෝජන්ගේ තීන්දුවට එරෙහිව සෞදි අරාබි ශ්‍රේෂ්ඨාධිකරණයේ ඇපීල් කරයි..

හිරු රූපවාහිනී නාලිකාවේ පැවති වැඩසටහනකට එක්වෙමින් ඔහු මේ පිළිබඳ වැඩිදුර තොරතුරු හෙළි කළේය. අනෝජන්ට මරණ දඬුවම නියම වී නොමැති බවට සමාජ මාධ්‍ය ඔස්සේ පැතිර ගිය ප්‍රචාර අසත්‍ය බවත්, ඔහුට එරෙහිව මරණ දඬුවම් නියෝගය ප්‍රකාශයට පත්ව ඇති බව සත්‍යයක් බවත් හෙතෙම තහවුරු කළේය. මෙම අර්‍බුදකාරී තත්ත්වය හමුවේ තමන් ඇතුළු පවුලේ සාමාජිකයන් ජනාධිපතිවරයා හමුවූ බවත්, කෙසේ හෝ තම පුත්‍රයා බේරා දෙන බවට ජනාධිපතිවරයා එහිදී ප්‍රතිඥා දුන් බවත් ඔහු ප්‍රකාශ කළේය. ඒ අනුව, විදේශ කටයුතු අමාත්‍යාංශය මැදිහත් වී විශේෂ රාජ්‍ය තාන්ත්‍රික කණ්ඩායමක් පත් කර සෞදි අරාබිය බලා පිටත් කර හැරීමටත්, රාජ්‍ය තාන්ත්‍රික මට්ටමින් මෙම ගැටලුව කඩිනමින් විසඳා ගැනීමටත් තීරණය වී ඇත. ඊට අමතරව, නීතිමය කාල රාමුව තුළ එරට ශ්‍රේෂ්ඨාධිකරණයට අභියාචනයක් ඉදිරිපත් කිරීමට නියමිත අතර, ඊට අදාළ වන සියලුම මූල්‍ය වියදම් රජය විසින් සම්පූර්‍ණයෙන්ම දරන බවට ද බලධාරීන් පවුලේ ඥාතීන්ට සහතික වී තිබේ. අනෝජන් වෙනත් සිරමැදිරියකට මාරු කර ඇති බවට පැතිරෙන වාර්‍තා පිළිබඳව අදහස් දක්වමින් එම ඥාතියා සඳහන් කළේ, නියමිත දින කිහිපය ඇතුළත නීතිමය ක්‍රියාමාර්‍ගයක් නොගතහොත් එවැනි ඉරණමකට මුහුණ දීමට සිදුවන බව අනෝජන් තමන් වෙත දැනුම් දුන් බවයි. සෞදි බන්ධනාගාරයේ සිටින අනෝජන් සමඟ දිනපතා විනාඩි කිහිපයක කාලයක් දුරකථනයෙන් අදහස් හුවමාරු කර ගැනීමට අවස්ථාව හිමිවන බවත්, රජය විසින් ගෙන ඇති ක්‍රියාමාර්‍ග සම්බන්ධයෙන් අද උදෑසන දැනුවත් කිරීමෙන් අනතුරුව ඔහු දැඩි මානසික සහනයකට පත්වූ බවත් අනෝජන්ගේ ඥාතියා වැඩිදුරටත් කියා සිටියේය.