එල් නිනෝ නිසා ලක්ෂ හතරහමාරකට අධික පිරිසක් මිය යයිලු..

ශාන්තිකර සාගරය කේන්ද්‍ර කරගනිමින් මේ වන විට ගොඩනැගෙමින් පවතින අතිශය ප්‍රබල ‘සුපිරි එල් නිනෝ’ දේශගුණික තත්ත්වය හේතුවෙන් ලොව පුරා අධික උෂ්ණත්වය ආශ්‍රිතව මිනිස් ජීවිත 450,000කට අධික සංඛ්‍යාවක් අහිමි වීමේ බරපතළ අවදානමක් මතුව ඇතැයි නවතම අධ්‍යයනයක් RT පුවත් සේවය වාර්‍තා කරයි. ලෝක කාලගුණ ඉතිහාසයේ මෙතෙක් වාර්‍තා වූ ප්‍රබලතම කාලගුණික සංසිද්ධිය බවට මෙය පත්විය හැකි බවත්, එහි දරුණුතම පීඩාව ලොව සංවර්‍ධනය වෙමින් පවතින රටවල් වෙත එල්ල වනු ඇති බවත් පර්‍යේෂකයෝ පෙන්වා දෙති. චිකාගෝ විශ්වවිද්‍යාලය ඇතුළු ප්‍රමුඛ පෙළේ ජාත්‍යන්තර පර්‍යේෂණ ආයතන එකමුතුවක් වන ‘ක්ලයිමේට් ඉම්පැක්ට් ලැබ්’ ආයතනය විසින් නිකුත් කරන ලද වාර්‍තාවකට අනුව, 2026–2027 වසරවල ක්‍රියාත්මක වන මෙම එල් නිනෝ තත්ත්වය හේතුවෙන් ලොව පුරා අතිරේකව පුද්ගල මරණ 451,000ක් සිදුවිය හැකි බව ගණන් බලා තිබේ. මෙම අසාමාන්‍ය උෂ්ණත්වයේ වැඩිම බලපෑම ගෝලීය දකුණේ රටවලට එල්ල වනු ඇතැයි පුරෝකථනය කර ඇති අතර, ඉදිරි මාස හය තුළ අප්‍රිකාවේ සහෙල් කලාපය තුළ පමණක් මරණ 66,800ක් සිදුවිය හැකි බව පැවසේ. ඒ අතරින් නයිජීරියාවෙන් මරණ 31,400ක් සහ සුඩානයෙන් මරණ 17,500ක් වාර්‍තා වනු ඇතැයි අපේක්ෂා කෙරේ. මීට අමතරව ඉන්දුනීසියාවෙන් මරණ 19,300ක්, ඉන්දියාවෙන් 15,800ක් සහ බ්‍රසීලයෙන් 13,300ක් වශයෙන් අධික උෂ්ණත්වය හේතුවෙන් ජීවිතක්ෂයට පත්විය හැකි බව වාර්‍තාව පෙන්වා දෙයි. මේ අතර, සැප්තැම්බර් සිට පෙබරවාරි දක්වා කාලය තුළ එක්සත් ජනපදයෙන් ද උෂ්ණත්වය ආශ්‍රිත අතිරේක මරණ 3,500ක් පමණ සිදුවිය හැකි බවට අනතුරු අඟවා ඇත. මේ පිළිබඳව අදහස් දක්වමින් ක්ලයිමේට් ඉම්පැක්ට් ලැබ් ආයතනයේ සම-නිර්‍මාතෘ සහ චිකාගෝ විශ්වවිද්‍යාලයේ මහාචාර්‍ය මයිකල් ග්‍රීන්ස්ටෝන් පෙන්වා දෙන්නේ, මෙම සංඛ්‍යාලේඛන හුදෙක් ඉලක්කම් පමණක් නොව, අප අතර ජීවත්වන මව්පියන්, දූදරුවන්, වැඩිහිටියන් සහ අසල්වාසීන් වැනි සැබෑ මිනිස් ජීවිත නියෝජනය කරන බවයි. යුරෝපා සංගමයේ කොපර්‍නිකස් දේශගුණික විපර්‍යාස සේවයට අනුව, ගෝලීය සාමාන්‍ය උෂ්ණත්වය සෙල්සියස් අංශක 16.96ක් ලෙස සටහන් කරමින් පසුගිය අගෝස්තු මාසය ලෝක ඉතිහාසයේ වාර්‍තා වූ උණුසුම්ම මාසය බවට පත්ව තිබූ අතර, බටහිර යුරෝපය ද මෙතෙක් පැවති උණුසුම්ම ග්‍රීෂ්ම ඍතුව පසුකර තිබේ. පෘථිවිය අඛණ්ඩව උණුසුම් වීමත් සමඟ ඉදිරි දශක දෙක තුළ මෙවැනි අධික උෂ්ණත්ව තත්ත්වයන් සුලබ සිදුවීම් බවට පත්වීමේ පෙරනිමිත්තක් ලෙස මෙම එල් නිනෝ සංසිද්ධිය ක්‍රියාත්මක වන බව පර්‍යේෂකයින් අනතුරු අඟවා ඇති බව වැඩිදුරටත් සඳහන් කරයි.