ඇමෙරිකා ප්‍රහාරක තර්‍ජනය හමුවේ ඉරාන වැසියෝ දැඩි බියෙන්.. ආහාර, ඉන්ධන, භාණ්ඩ රැස්කරති..
FM Heart · 2 min read
ඉරානය තුළ වෙසෙන පුරවැසියන් 18 දෙනෙකු සමඟ දුරකථන හා කෙටි පණිවිඩ ඔස්සේ කළ සාකච්ඡා ඇසුරෙන් එම පුවත්පත සකස් කළ වාර්‍තාවකට අනුව, නව සතිය ආරම්භ වීමත් සමඟ ටෙහෙරාන් ඇතුළු ප්‍රධාන නගරවල ජනතාව ඉන්ධන පිරවුම්හල් සහ බැංකු ඉදිරිපිට දිගු පෝලිම් ගැසෙමින් මුදල් ලබාගැනීමටත්, අත්‍යවශ්‍ය වියළි ආහාර ද්‍රව්‍ය එක්‍රැස් කර තබා ගැනීමටත් දැඩි පරිශ්‍රමයක යෙදී සිටිති. තම දරුවන් පාසල් යැවීම අවදානම් සහගත බව පවසමින් මව්පියන් දැඩි කනස්සල්ලෙන් පසුවන අතර, ගුවන් ගමන් සහ මහාමාර්‍ග අවහිර වීමේ බිය නිසා බොහෝ ව්‍යාපාරිකයන් සිය ගමන් බිමන් අවලංගු කර තිබේ. රාජ්‍ය තාන්ත්‍රික එකඟතාවකට නොපැමිණියහොත් ඇමෙරිකානු අන්තර්‍වාර මැතිවරණයෙන් පසු ඉරානයට ප්‍රහාර එල්ල කරන බවට ජනාධිපති ඩොනල්ඩ් ට්‍රම්ප් අනතුරු අඟවා ඇති අතර, එරට ආර්‍ථිකය ගොඩනැගීමට උදව් කරන බවටත්, විනාශ කර දමන බවටත් ඔහු නිකුත් කරන අනාවැකි කිව නොහැකි පරස්පර ප්‍රකාශ හේතුවෙන් ජනතාවගේ මානසික පීඩනය තවදුරටත් උග්‍ර වී ඇත. අනෙක් අතට, දැඩි මැතිවරණ තරගයක නිරතව සිටින ඊශ්‍රායල අගමැති බෙන්ජමින් නෙතන්‍යාහු, ඉරාන පාලනය පෙරළා දැමීම සඳහා ඇමෙරිකාව සමඟ එක්විය යුතු බවට ප්‍රකාශ කිරීමත් සමඟ, මැතිවරණයට පෙර ඊශ්‍රායලය හදිසි මිලිටරි ප්‍රහාරයක් දියත් කරනු ඇතැයි ද ඉරාන ජනතාව බිය පළ කරති. පාකිස්තානය, කටාර් රාජ්‍යය සහ රුසියාව ප්‍රමුඛ රටවල් දැඩි රාජ්‍ය තාන්ත්‍රික මැදිහත්වීමක නිරත වුවද, ඉරානය සහ වොෂින්ටනය අතර සාකච්ඡා මේ වන විට ඇණහිට තිබේ. ඉරාන න්‍යෂ්ටික වැඩසටහන සම්බන්ධයෙන් ඇමෙරිකාව ඉදිරිපත් කරන කොන්දේසිවලට යටත් නොවන බව ටෙහෙරාන් බලධාරීන් ප්‍රකාශ කරන අතර, තමන්ට පහර දුනහොත් සමස්ත කලාපයම ගිනි තබන බවට හමුදා ප්‍රධානීන් අනතුරු අඟවමින් සිටියි. කෙසේ වෙතත්, තවදුරටත් යුද්ධයකට නොගොස් සාමකාමී විසඳුමක් සොයන ලෙස ඉරානයේ ප්‍රතිසංස්කරණවාදී දේශපාලනඥයන් රජයෙන් ඉල්ලා ඇති අතර, පාලකයන්ගේ තීන්දු වෙනුවෙන් වන්දි ගෙවීමට සිදුවන්නේ සාමාන්‍ය ජනතාවට බව ඔවුහු පෙන්වා දෙති. පසුගිය කාලය පුරා පැවති දින 40ක දැවැන්ත බෝම්බ ප්‍රහාර හමුවේ ඉරානයේ සිවිල් වැසියන් 1,900කට වැඩි පිරිසක් මියගොස් ඇති බව ඉරාන රතු චන්ද්‍රවංක සංගමය වාර්‍තා කර ඇති අතර, ඉන් සිදුවූ ආර්‍ථික හානිය ඩොලර් බිලියන 300ක් පමණ වේ. ඉකුත් පෙබරවාරියේදී දකුණුදිග මිනාබ් (Minab) නගරයේ ප්‍රාථමික පාසලකට එල්ල වූ ඇමෙරිකානු ප්‍රහාරයකින් දරුවන් සහ ගුරුවරුන් 156 දෙනෙකු ජීවිතක්ෂයට පත්වීම තවමත් වැසියන්ගේ මනසින් බැහැරව නොමැත. ඇමෙරිකානු සම්බාධක සහ නාවික අවහිරතා හමුවේ ඉරාන රියාල් මුදලේ අගය දැඩි ලෙස කඩා වැටී ඇති අතර, අත්‍යවශ්‍ය ආහාර ද්‍රව්‍යවල මිල ගණන් සියයට 200කට වඩා ඉහළ යාම නිසා ජීවන අරගලය හමුවේ මෙන්ම යුද බියෙන් ද ජනතාව අන්ත අසරණ තත්ත්වයකට පත්ව සිටින බව 'ද නිව්‍යෝර්‍ක් ටයිම්ස්' පුවත්පත වැඩිදුරටත් අනාවරණය කරයි.
