බයිනෑන්ස් වෙත දැවැන්ත හැකර් ප්‍රහාරයක්.. බිලියන ගාණක් කොල්ලකයි.. මුදල් ගැනීම, දැමීම අත්හිටුවයි..

මෙය ඩිජිටල් වත්කම් ඉතිහාසයේ මෙතෙක් වාර්‍තා වූ බරපතළම සහ විශාලතම ආරක්ෂක බිඳවැටීම්වලින් එකක් ලෙස සැලකෙන බව එම පුවත්පත් වාර්‍තාව පෙන්වා දෙයි. සිද්ධිය සම්බන්ධයෙන් නිවේදනයක් නිකුත් කරමින් බයිනෑන්ස් සමාගම පවසා ඇත්තේ, මෙම සයිබර් ප්‍රහාරයෙන් සිදුවූ සමස්ත බලපෑම ඩොලර් බිලියන 6.3ක් පමණ වන බවට ගණන් බලා ඇති බවයි. කෙසේ වෙතත්, අදාළ බ්ලොක්චේන් හවුල්කාර සමාගම් සමඟ එක්ව වහාම ක්‍රියාත්මක වූ බයිනෑන්ස් ජාලය, සොරකම් කරන ලද වත්කම්වලින් ඩොලර් බිලියන 3ක පමණ මුදලක් ජාලය තුළදීම මේ වන විටත් අත්හිටුවීමට සමත්ව ඇති බව සඳහන් කර තිබේ. මූලික විමර්‍ශනවලට අනුව, සමාගමේ මෘදුකාංග මෙහෙයුම් ඉංජිනේරුවරයෙකුගේ ලැප්ටොප් පරිගණකයක ආරක්ෂක පද්ධතිය බිඳහෙළීම හරහා හැකර්‍වරුන් අභ්‍යන්තර සේවා පද්ධතියට ප්‍රවේශ වී අනවසරයෙන් මුදල් ආපසු ගැනීමේ නියෝග නිකුත් කර ඇති බව හෙළිව ඇත. කෙසේ වෙතත් ගනුදෙනුකරුවන්ගේ පුද්ගලික මුරපද කිසිවක් පිටතට කාන්දු වී නොමැති බව සමාගම අවධාරණය කරයි. මේ අතර, ප්‍රධාන පෙළේ ඩිජිටල් මුදල් සමාගමක් වන Tether සමාගමේ ප්‍රධානී පාවුලෝ ආර්‍ඩොයිනෝ සඳහන් කර ඇත්තේ, හැකර්‍වරුන් කොල්ලකෑ මුදල් අතරින් ඩොලර් බිලියන 1.547ක USDT වත්කම් වහාම ක්‍රියාත්මක වන පරිදි අත්හිටුවීමට පියවර ගත් බවයි. දෙවන විශාලතම ස්ටේබල්කොයින් සමාගම වන ‘සර්‍කල්’ ආයතනයද ඩොලර් මිලියන 800ක වත්කම් අත්හිටුවීමට පියවර ගෙන ඇත. බයිනෑන්ස් සමාගමේ නිර්‍මාතෘ සිය 'X' ගිණුම ඔස්සේ පණිවිඩයක් නිකුත් කරමින් පාරිභෝගිකයන් හට දන්වා ඇත්තේ සියලු ගනුදෙනුකරුවන්ගේ තැන්පතු සුරක්ෂිතව පවතින බවයි. කෙසේ වෙතත්, මෙම දැවැන්ත සොරකම පිළිබඳ පුවතත් සමඟ ගෝලීය ක්‍රිප්ටෝ වෙළෙඳපොළ දැඩි කැළඹීමකට ලක්ව ඇති බව ‘ෆිනෑන්ෂල් ටයිම්ස්’ වාර්‍තා කරයි. ඒ අනුව බිට්කොයින් මිල සියයට 3.2කින් පහත වැටී අඩුවූ අතර, බයිනෑන්ස් ජාලයට අයත් BNB ටෝකනයේ අගය සියයට 7.5කින් කඩා වැටිණි. මීට පැය කිහිපයකට පෙර තවත් ජනප්‍රිය වෙළෙඳ වේදිකාවක් වන Polymarket ජාලයද මෙවැනිම සයිබර් තර්‍ජනයක් හේතුවෙන් සිය ගනුදෙනු තාවකාලිකව අත්හිටුවා තිබිණි. 2017 වසරේදී ආරම්භ කරන ලද බයිනෑන්ස් සමාගම, මේ වන විට ඩොලර් බිලියන 140කට අධික ඩිජිටල් වත්කම් කළමනාකරණය කරන ලොව විශාලතම ක්‍රිප්ටෝ සමාගමයි. කෙසේ වෙතත්, මුදල් විශුද්ධිකරණ විරෝධී නීති උල්ලංඝනය කිරීමේ චෝදනා මත ඇමෙරිකානු බලධාරීන් සමඟ ඇති කරගත් එකඟතාවක් අනුව එහි නිර්‍මාතෘ චැංපෙන්ග් ෂාඕට 2023 දී සමාගමේ කළමනාකාරිත්වයෙන් ඉල්ලා අස්වීමට සිදුවිය. අනතුරුව ඔහුට ඇමෙරිකානු ජනාධිපති ඩොනල්ඩ් ට්‍රම්ප් විසින් පසුගිය වසරේදී පූර්‍ණ ජනාධිපති සමාව ලබා දෙන ලදී. මෑත වසරවලදී ක්‍රිප්ටෝ හුවමාරු මධ්‍යස්ථාන ඉලක්ක කරගනිමින් සිදුවන සයිබර් ප්‍රහාර සීඝ්‍රයෙන් ඉහළ ගොස් ඇති අතර, 'Chainalysis' දත්ත වාර්‍තාවලට අනුව පසුගිය වසරේදී පමණක් උතුරු කොරියානු හැකර්‍වරුන් විසින් Bybit සමාගමෙන් ඩොලර් බිලියන 1.5ක් ඇතුළුව සමස්තයක් ලෙස ඩොලර් බිලියන 2.02ක ක්‍රිප්ටෝ වත්කම් කොල්ලකා තිබිණි. අප්‍රේල් මාසයේදීද ‘Drift’ නම් සමාගමෙන් ඩොලර් මිලියන 280ක් කොල්ලකෑමට හැකර්‍වරු සමත් වූහ.