න්‍යෂ්ටික ගිවිසුමකින් තොරවම ඉරාන යුද්දයෙන් පිටවෙන්න ට‍්‍රම්ප් පාරක් සොයයි..- WSJ

න්‍යෂ්ටික ගිවිසුමකින් තොරව වුවද මෙම ගැටුම අවසන් කිරීමට තමන් සූදානම් බව ජනාධිපති ට්‍රම්ප් සිය ජ්‍යෙෂ්ඨ උපදේශකයින්ට පෞද්ගලිකව දැනුම් දී තිබුණි. එහෙත්, හෝමුස් සමුද්‍ර සන්ධිය හරහා නාවික ගමනාගමනයට අවසර දීම වෙනුවෙන් ඉරානය පසුගිය සෙනසුරාදා පෙර නොවූ විරූ ඉල්ලීම් කිහිපයක් ඉදිරිපත් කළේය. අමෙරිකාවෙන් ඩොලර් බිලියන ගණනක වන්දි මුදල් ලබා ගැනීම, කලාපයෙන් අමෙරිකානු හමුදා ඉවත් කර ගැනීම සහ පනවා ඇති නාවික අවහිරතා සම්පූර්ණයෙන්ම ඉවත් කිරීම ඉරානයේ ප්‍රධාන කොන්දේසි අතර වේ. මෙම තත්ත්වය හමුවේ ගැටුමෙන් ගෞරවනීය ලෙස ඉවත් වීමට ට්‍රම්ප්ට තිබූ අවස්ථා සීමා වී ඇති බව දේශපාලන විශ්ලේෂකයෝ පෙන්වා දෙති. ඉරානය දිගුකාලීන ගැටුමකට සූදානම් බව පෙන්වන අතර, අමෙරිකානු ජනාධිපතිවරයා කෙසේ හෝ මෙම අර්බුදයෙන් මිදීමට උත්සාහ කරන බව වටහාගෙන ඔවුන් සිය ස්ථාවරය තවදුරටත් දැඩි කර ඇත. අමෙරිකාවේ අතුරු මැතිවරණයට තවත් මාස තුනකටත් අඩු කාලයක් ඉතිරිව තිබියදී, ඉහළ ගොස් ඇති ඉන්ධන මිල පාලනය කිරීම ට්‍රම්ප් පාලනයට විශාල අභියෝගයක් වී තිබේ. පෙබරවාරි මාසයේ යුද්ධය ආරම්භ වීමට පෙර පැවති මිලට වඩා ඉන්ධන මිල තවමත් ඉහළ මට්ටමක පවතින බැවින්, යුද්ධය ජයග්‍රහණය කළ බව අමෙරිකානු ජනතාවට ඒත්තු ගැන්වීමට ජනාධිපතිවරයා දැඩි උත්සාහයක නිරත වේ. න්‍යෂ්ටික අවි සම්බන්ධ සාකච්ඡා අසාර්ථක වීමත් සමඟ වයිට් හවුස් පාලනය මේ වන විට වැඩි අවධානයක් යොමු කර ඇත්තේ හෝමුස් සමුද්‍ර සන්ධිය විවෘත කර ගැනීම කෙරෙහි පමණි. ඉරානය විසින් එල්ල කරන මිසයිල සහ ඩ්‍රෝන ප්‍රහාර හේතුවෙන් ගෝලීය තෙල් වෙළඳපොළ අස්ථාවර වී ඇති අතර, එය ඉරානයට ප්‍රබල දේශපාලන මෙවලමක් වී ඇත. මේ අතර, ඉරාන ජාතික ආරක්ෂක මණ්ඩලයේ ලේකම් මොහොමඩ් බගර් සොල්ගාදර් ප්‍රකාශ කර ඇත්තේ අමෙරිකාව සියලු සම්බාධක ඉවත් කර යුද වන්දි ගෙවන තෙක් සමුද්‍ර සන්ධිය විවෘත නොකරන බවයි. පසුගිය සති අන්තයේ එක්සත් අරාබි එමීර් රාජ්‍යයට අයත් නෞකාවකට ඉරානය මිසයිල ප්‍රහාරයක් එල්ල කිරීමත් සමඟ රාජ්‍ය තාන්ත්‍රික විසඳුමකට ඇති ඉඩකඩ තවදුරටත් අඳුරු වී තිබේ. කෙසේ වෙතත්, ජනාධිපති ට්‍රම්ප් පවසන්නේ ඉරානයේ ප්‍රධාන න්‍යෂ්ටික මධ්‍යස්ථාන පසුගිය වසරේ විනාශ කළ බැවින්, ඔවුන්ට සිය න්‍යෂ්ටික වැඩසටහන යළි පණ ගැන්වීමට නොහැකි වනු ඇති බවයි. අමෙරිකානු බදු ගෙවන්නන්ගේ මුදල් ඉරානයට ලබා නොදෙන බවට ඔහු අවධාරණය කළද, ඉරානයේ අත්හිටුවා ඇති වත්කම් නිදහස් කිරීමකින් තොරව එකඟතාවයකට පැමිණීම දුෂ්කර වනු ඇතැයි විශ්වාස කෙරේ. අමෙරිකානු උප ජනාධිපති ජේ.ඩී. වෑන්ස් ප්‍රකාශ කළේ ඉරානයට දිගින් දිගටම පීඩනය එල්ල කරන අතරම, මැදපෙරදිගින් වැඩි වශයෙන් තෙල් සහ ගෑස් ලබාගෙන අමෙරිකානු ජනතාවට සහන සැලසීමට රජය කටයුතු කරන බවයි.