සංචාරකයන් දෙදෙනෙකුගේ සිරුරු ගසක එල්ලෙමින් තිබියදී හමුවේ...

මෙසේ මියගොස් ඇත්තේ 57 හැවිරිදි වියේ පසු වූ ප්‍රංශ ජාතිකයෙකු සහ 52 හැවිරිදි වියේ පසු වූ ස්කොට්ලන්ත ජාතිකයෙකු බව පොලිසිය විසින් හඳුනාගෙන තිබේ. මොවුන් දෙදෙනා වැලිගම, ගුරුබැවිල ප්‍රදේශයේ සංචාරක හෝටලයක නවාතැන් ගෙන සිටි පිරිසක් බව විමර්‍ශනවලදී අනාවරණය වී ඇත. මෙම විදේශිකයන් දෙදෙනා සියදිවි නසාගෙන ඇති බවට මූලික විමර්‍ශනවලදී සැක කරන බව උසස් පොලිස් නිලධාරියෙකු සඳහන් කළේය. කෙසේ වෙතත්, ඔවුන් මෙවැනි තීරණයක් ගැනීමට හේතුව මෙතෙක් අනාවරණය වී නොමැති අතර, සිරුරු පිළිබඳ පශ්චාත් මරණ පරීක්ෂණ පැවැත්වීමට නියමිතව තිබේ. මාතර කොට්ඨාසය භාර ජ්‍යෙෂ්ඨ පොලිස් අධිකාරී වසන්ත කුමාර මහතාගේ උපදෙස් මත තිහගොඩ පොලිසියේ නිලධාරීන් කණ්ඩායමක් සිද්ධිය සම්බන්ධයෙන් වැඩිදුර විමර්‍ශන පවත්වයි.