මේක පාස්කු මහ නඩුව නෙමෙයි.. මහ මොළකරුවන් අල්ලා කුමන්ත්‍රණය හෙළි කරගත යුතුයි..

මාධ්‍ය හමුවක් අමතමින් උන්වහන්සේ පෙන්වා දුන්නේ, සහරාන් හෂීම් ඇතුළු අන්තවාදී කල්ලිය විසින් දේවස්ථාන සහ හෝටල් ඉලක්ක කර එල්ල කළ මරාගෙන මැරෙන ප්‍රහාරයට අදාළව පුද්ගලයින් 25 දෙනෙකුට එරෙහිව පැවති නඩුවෙහි තීන්දුව ප්‍රකාශයට පත් වූ බවයි. එම තීන්දුව තුළින් අන්තවාදී මතවාදයන් සමාජයට කොතරම් තර්‍ජනයක්ද යන්න මෙන්ම වින්දිතයන්ට සහ ජාතික ආරක්ෂාවට සාධාරණයක් ඉටු වූ බව පැහැදිලි වන නමුත්, එය සමස්ත පාස්කු ප්‍රහාරයට අදාළ එක් නඩුවක් පමණක් බව උන්වහන්සේ සිහිපත් කළහ. මාධ්‍ය විසින් මෙම නඩුව මහා නඩුව ලෙස හැඳින්වුව ද එය සැබෑ මහ නඩුව නොවන බවත්, ප්‍රහාරය සම්බන්ධයෙන් තවත් ක්ෂේත්‍ර රැසක් ඔස්සේ පරීක්ෂණ සහ නඩු කටයුතු ක්‍රියාත්මක විය යුතුව පවතින බවත් උන්වහන්සේ සඳහන් කළහ. දැනටමත් වින්දිතයන් විසින් වන්දි ඉල්ලා ගොනු කර ඇති නඩු සියයකට අධික සංඛ්‍යාවක් විවිධ අධිකරණවල විභාග වෙමින් පවතින බව පියතුමා පෙන්වා දුන්නේය. ඊට අමතරව, බ්‍රිතාන්‍ය චැනල් 4 නාලිකාව ඔස්සේ හෙළිදරව් වූ කරුණු පදනම් කරගනිමින් බී වාර්‍තා මඟින් මහේස්ත්‍රාත් අධිකරණය හමුවේ ක්‍රියාත්මක වන විමර්‍ශන මෙන්ම සුරේෂ් සලේ ඇතුළු පුද්ගලයින් අත්අඩංගුවට ගෙන සිදු කෙරෙන නීතිමය ක්‍රියාමාර්‍ග ද තවමත් පරීක්ෂණ මට්ටමේ පවතින බව උන්වහන්සේ සිහිපත් කර සිටියහ. ප්‍රහාරය පිළිබඳව පූර්‍ව බුද්ධි තොරතුරු ලැබී තිබියදීත් එය වළක්වා ගැනීමට කටයුතු නොකළ නිලධාරීන්ගෙන් දෙදෙනෙකුට දැනටමත් අධිකරණයෙන් දඬුවම් නියම වී ඇති නමුත්, රාජකාරිය පැහැරහළ තවත් නිලධාරීන් සම්බන්ධයෙන් නීතිමය පියවර ගත යුතුව ඇති බව ද උන්වහන්සේ පෙන්වා දුන්හ. එබැවින් සහරාන්ට සහාය දුන් පිරිසට දඬුවම් ලැබීමට එහා ගොස්, මෙම ප්‍රහාරය සැලසුම් කළ සහ කුමන්ත්‍රණය මෙහෙයවූ සැබෑ මහ මොළකරුවන් කවුරුන්ද යන්න විධිමත් පරීක්ෂණ මඟින් අනාවරණය කරගෙන, ඔවුන්ව ද කඩිනමින් නීතිය හමුවට පමුණුවනු ඇතැයි කතෝලික සභාව දැඩිව අපේක්ෂා කරන බව සිරිල් ගාමිණී ප්‍රනාන්දු පියතුමා වැඩිදුරටත් කියා සිටියේය.