ගෝලීය සංචාරක ක්ෂේත්‍රයේ ශීඝ්‍රයෙන්ම ඉදිරියට එන රටවල් 10 අතරට ශ්‍රී ලංකාව..- ලෝක ආර්‍ථික සංසද වාර්‍තාව

ලෝක ආර්‍ථික සංසදය විසින් සූරිච් ඉන්ෂුවරන්ස් සමූහය (Zurich Insurance Group) සමඟ එක්ව ප්‍රකාශයට පත් කරන ලද නවතම "සංචාරක සහ සංචාරක සංවර්‍ධන දර්‍ශකය - 2026" (Travel & Tourism Development Index - TTDI) මඟින් මේ බව අනාවරණය කර ඇත. මෙම වාර්‍තාවට අනුව, 2024 සිට 2026 දක්වා වූ කාලසීමාව තුළ සිය දර්‍ශක අගය සියයට 4.3 ක කැපී පෙනෙන වර්‍ධනයක් අත්කර ගැනීමට ශ්‍රී ලංකාව සමත්ව තිබේ. ඒ අනුව, ලොව වේගයෙන්ම ප්‍රගතියක් අත්කරගත් රටවල් අතර 10 වැනි ස්ථානය මෙරටට හිමිව ඇත. මෙම ලැයිස්තුවේ පෙරමුණ ඇල්බේනියාව (+7.0%) විසින් දිනාගෙන ඇති අතර, වියට්නාමය (+6.3%), ලාඕසය (+6.1%), කටාර් (+6.0%), මැලේසියාව (+5.8%), තායිලන්තය (+5.6%), පිලිපීනය (+5.5%), මොරොක්කෝව (+5.5%) සහ නේපාලය (+5.1%) පිළිවෙළින් අනෙකුත් ස්ථානවල රැඳී සිටියි. වේගවත්ම සංවර්‍ධනයක් පෙන්වූ රටවල් 10 අතුරින් රටවල් 7ක්ම ආසියා පැසිෆික් කලාපයට අයත් සංවර්‍ධනය වෙමින් පවතින ආර්‍ථිකයන් වීම විශේෂත්වයකි. සාපේක්ෂව අඩු මිල ගණන්, සුවිශේෂී ස්වාභාවික සම්පත් සහ තිරසාර ඉල්ලුම් රටාවන් මෙම වර්‍ධනයට මූලික හේතුව වී ඇති බව වාර්‍තාව පෙන්වා දෙයි. මෙම දර්‍ශකයේ සමස්ත විශිෂ්ටතම කාර්‍යසාධනය පෙන්නුම් කළ රටවල් අතර එක්සත් ජනපදය අබිබවා පෙරමුණ ගැනීමට ජපානය (5.27) සමත්ව ඇති අතර, ඇමරිකා එක්සත් ජනපදය (5.23), ස්පාඤ්ඤය (5.22), ඕස්ට්‍රේලියාව (5.18) සහ ප්‍රංශය (5.17) පිළිවෙළින් පළමු රටවල් පහ අතරට ඇතුළත්ව තිබේ. ලෝකයේ රටවල් 110ක දත්ත පාදක කරගනිමින්, ක්ෂේත්‍ර 17ක් ඔස්සේ සංචාරක කර්‍මාන්තයේ යටිතල පහසුකම්, සංස්කෘතික හා ස්වාභාවික සම්පත්වල වටිනාකම සහ තිරසාරභාවය මැන බැලීමෙන් අනතුරුව මෙම වාර්‍තාව සම්පාදනය කර ඇතැයි ලෝක ආර්‍ථික සංසදය වැඩිදුරටත් වාර්‍තා කරයි.