සීමිත විදුලි කප්පාදුවක්..?

අක්‍රිය වූ නොරොච්චෝලේ බලාගාරයේ පළමු ජනන ඒකකය යථා තත්ත්වයට පත්කර පද්ධතියට එක්කිරීම සඳහා අවම වශයෙන් තවත් දින හතරක් හෝ පහක කාලයක් ගතවනු ඇත. ඉරිදා දිනයේදී කාර්‍මික කටයුතු අවම වීම නිසා විදුලි ඉල්ලුම සාපේක්ෂව පහළ මට්ටමක පැවතීමත්, දිවා කාලයේදී සූර්‍ය බලශක්තිය පද්ධතියට එක්වීමත් හේතුවෙන් ගැටලුවක් මතු නොවූවද, වැඩකරන දින ආරම්භ වීමත් සමඟ සමස්ත විදුලි ඉල්ලුම සීඝ්‍රයෙන් ඉහළ යන බැවින් පද්ධතිය කළමනාකරණය කරගැනීම බරපතළ අභියෝගයක් වනු ඇති බව ඒ මහතා පෙන්වා දෙයි. විශේෂයෙන්ම පෙරවරු 7:00 සිට රාත්‍රී 9:00 දක්වා වන උපරිම විදුලි ඉල්ලුම පවතින කාලසීමාවන් තුළ පවතින ජනන ධාරිතාව ප්‍රමාණවත් වේද යන්න පිළිබඳව බලධාරීන් දැඩි අවධානය යොමුකළ යුතු බව ඔහු සඳහන් කරයි. ඩීසල් සහ දැවිතෙල් භාවිත කරන මිල අධික තාප විදුලි බලාගාර පැය 24 පුරා අඛණ්ඩව ක්‍රියාත්මක කළද, මතු වන ඉල්ලුම සම්පූර්‍ණයෙන් පියවා ගත හැකිද යන්න ප්‍රශ්න සහගත බව පවසන ආචාර්‍ය රලපනාව මහතා, එමඟින් දැරීමට සිදුවන අධික පිරිවැය අවසානයේදී ජනතාව පිටම පැටවෙනු ඇති බවද පෙන්වා දෙයි. බලාගාර යථා තත්ත්වයට පත්වන තෙක් පවතින විදුලි හිඟය කළමනාකරණය කරගැනීමට රජය වහා ක්‍රියාමාර්‍ග ගත යුතු බව අවධාරණය කරන ඒ මහතා, බලධාරීන්ගේ දිගුකාලීන උදාසීනත්වය විවේචනය කරයි. "මෙවැනි මහා පරිමාණ බිඳවැටීම් සිදුවූ පළමු අවස්ථාව මෙය නොවේ. මීට පෙර මෙවැනි සිදුවීම් වැළැක්වීම සඳහා විවිධ ආයතන හා කමිටු මඟින් නිර්‍දේශ රැසක් ඉදිරිපත් කළා. නමුත් එම කිසිදු නිර්‍දේශයක් නිසි පරිදි ක්‍රියාත්මක නොකර වගකීම් පැහැර හැර තිබෙනවා. දැන් කළ යුත්තේ බිඳවැටීමට ආසන්නතම හේතුව පමණක් සොයමින් සිටීම නොවේ. වඳුරා පැන්නේ කොතැනටද කියා සෙවීම පසෙකලා, මොන වඳුරා කොතැනට පැන්නත් පද්ධතිය නොවැටී ස්ථාවරව පවත්වාගන්නේ කෙසේද යන්න සොයාබලා ඊට කඩිනමින් පිළියම් යෙදීමයි,"