පොලිස් ඔත්තුකරුවෙකු ඝාතනය කර හිස ඔ්ලුගලගේ නිවසට යවන්න පාතාල සැලසුමක්..

2025 වසරේ නොවැම්බර් මස 12 වනදා කිරින්ද, අඳගලවැල්ල මුහුදු ප්‍රදේශයේදී රුපියල් කෝටි 400කට ආසන්න වටිනාකමකින් යුත් දැවැන්ත අයිස් මත්ද්‍රව්‍ය තොගයක් සමඟ සැකකරුවන් හත්දෙනෙකු අත්අඩංගුවට ගනු ලැබුවේ මෙම පොලිස් උපාය දූතයා ලබා දුන් නිශ්චිත බුද්ධි තොරතුරකට අනුවය. ඊට පළිගැනීමක් ලෙස විදේශගතව සැඟව සිටින සංවිධානාත්මක අපරාධකරුවන් වන ‘රූබන්’ සහ ‘අංගොඩ ප්‍රියංකර’ යන පාතාල නායකයින් විසින් අදාළ ඔත්තුකරු ඝාතනය කර, ඔහුගේ හිස කපා සහකාර පොලිස් අධිකාරී රොහාන් ඕලුගල මහතාගේ නිවෙස ඉදිරිපිට දමා යාමට සැලසුම් කර තිබූ බව හෙළිව ඇත. එම මුල් උත්සාහය ව්‍යර්‍ථ වීමෙන් පසු, පසුගිය 05 වනදා පොලිස් ජීප් රථයකට සමාන ව්‍යාජ ජීප් රථයකින් පැමිණ අදාළ උපාය දූතයාව රිය අනතුරකට ලක්කර ඝාතනය කිරීමට උත්සාහ කර තිබූ අතර, එම ප්‍රයත්නය ද අසාර්‍ථක විය. එම අපරාධය සඳහා යොදාගත් ජීප් රථය පසුව කඩුවෙල, හේවාගම ප්‍රදේශයේ ගරාජයක සඟවා තිබියදී ආරක්ෂක අංශ විසින් සොයාගන්නා ලදී. ඝාතනය මෙහෙයවීමට පැමිණි කුලී ඝාතකයින් දෙදෙනා සෙල්ල කතරගම ප්‍රදේශයේ ලැගුම්ගෙන සිටියදී වලාන දූෂණ මර්‍දන ප්‍රහාරක ඒකකය මගින් අත්අඩංගුවට ගෙන තිබේ. මෙලෙස අත්අඩංගුවට පත්ව ඇත්තේ වැල්ලම්පිටිය ප්‍රදේශයේ පදිංචි 41 හැවිරිදි මධුක චාමර හෙවත් ‘මධුවා’ සහ ඉංගිරිය ප්‍රදේශයේ පදිංචි 38 හැවිරිදි නලින් නමැති සැකකරුවන්‍ය. අදාළ උපාය දූතයා ඝාතනය කර හිස ගසා දැමීම සඳහා විශේෂයෙන් සූදානම් කර තිබූ මන්නා පිහි දෙකක් සහ මත්ද්‍රව්‍ය තොගයක් සැකකරුවන් සන්තකයේ තිබී පොලිසිය විසින් සොයාගෙන ඇති අතර සිද්ධිය සම්බන්ධයෙන් පුළුල් විමර්‍ශන ක්‍රියාත්මක වේ.